Oración da mañá do 10 de marzo de 2012

Do desalento á esperanza, na ledicia de sermos persoas basicamente amadas e perdoadas.

Signo: Unha pedra branca.

Silencio: toma de conciencia de min mesmo/a, da comunidade, de Deus.

Canto

Ergo os meus ollos cara aos montes

de onde me vai vir a axuda?

Vaime vir do Señor Deus

que fixo o ceo e mais a terra (2)

SALMO 51 (50)

Canto ansío, meu Deus, que borres

coa túa compaixón o meu pecado!,

que me laves ben da miña iniquidade,

que me limpes da miña culpa!

Eu recoñezo o meu pecado,

e teño sempre presente a miña culpa.

Contra ti, contra ti mesmo , eu pequei

e fixen o que é malo aos teus ollos:

por iso será xusta a túa sentenza

e aparecerá recto o teu xuízo.

Si, eu nacín na fraxilidade,

ser humano e pecador concibiume miña nai;

ti amas a verdade no corazón

e no íntimo ensínasme sabedoría.

Se ti me purificas,  serei limpo;

se ti me lavas, quedarei branco coma a neve.

Que sinta o teu gozo, a túa ledicia,

que relouquen os meus ósos quebrantados.

Que a túa ollada envolva o meu pecado,

para borrar de todo as miñas culpas.

Deus, só ti podes crear en min un corazón puro,

e renovarme por dentro cun espírito firme.

Que nunca me arrede da túa presenza,

que non lle peche as portas ao teu santo espírito.

Devólvesme a alegría da túa salvación,

sostesme co espírito xeneroso

Ensinarei o teu camiño á xente pecadora

e volverán a ti os extraviados.

Hasme librar da violencia,

Señor, meu Deus e salvador,

e a miña lingua contará a túa xustiza.

Cando ti abres os meus labios, Señor,

a miña boca pregoa a túa loanza.

Con sacrificios ti non te compraces,

se che ofrezo holocaustos, non os aceptarás.

O meu sacrificio, Deus, será o espírito contrito;

un corazón contrito e humilde

ti, Deus, non o desprezas.

Meu Deus, que goce o teu pobo coa túa bondade,

que se vexa defendido pola túa misericordia!

Entón aceptarás a ofrenda do seu amor,

e a xustiza florecerá nas súas mans orantes.

Apoc 2, 17

Preces. Noso Pai.