4º Encontro 2018 /2019

1.- Na escola de oración de Xesús: “Erguéndose moi cedo, aínda de noite, saíu para un lugar solitario, onde se puxo a orar” (Mc 1, 35)

CANTO:

QUERO ESTAR AO TEU LADO, MEU DEUS (3)  

(quen son eu, quen o Deus que me sostén)

 2.- Con Xesús oramos o Salmo 103: (versión á luz do Evanxeo)

Alma miña, bendí o Señor

e todo o meu ser, o seu santo nome!

Alma miña, bendí o Señor,

non esquezas os seus beneficios!

El perdoa as túas culpas

e sanda as túas doenzas,

rescata a túa vida da morte

e coróate de amor e de tenrura;

farta de bens a túa existencia

e renova a túa mocidade como a da aguia.

ALMA MIÑA, BENDI O SEÑOR.

O Señor fai xustiza

e defende o dereito da xente oprimida.

Mostroulle ao seu pobo os seus camiños,

a todas as nacións as súas fazañas.

O Señor é misericordioso e clemente,

paciente e rico en tenrura.

Non está sempre acusando,

nin é o seu anoxarse coa xente.

Non nos trata conforme os nosos erros,

nin nos paga conforme as nosas culpas.

ALMA MIÑA, BENDÍ O SEÑOR.

Como de grande é a distancia entre o ceo e a terra,

así de grande é o seu amor con todo o mundo;

canto dista o nacente do poñente,

así arreda de nós as nosas culpas;

canto unha nai ama os seus fillos e fillas,

así ama o Señor a todas as persoas.

El sabe de que estamos feit@s,

recorda que somos barro.

Os días do ser humano son coma palla,

o seu florecer coma o da flor;

aínda non a roza o vento, xa se foi,

e o seu sitio xa non a volve ver.

ALMA MIÑA, BENDI O SEÑOR.

Mais para quen o venera

o amor do Señor dura por sempre,

a súa xustiza chega á descendencia

de quen garda a súa alianza,

de quen recorda os seus mandatos e os cumpre.

O Señor asentou entre nós o seu trono

e o seu reino goberna o universo.

Bendicide o Señor, os seus anxos,

seres poderosos ás súas ordes,

que obedecedes a súa palabra.

Bendicide o Señor, xente toda,

cumprindo a súa vontade.

Bendicide o Señor, as súas obras,

en todos os lugares do seu reino.

ALMA MIÑA, BENDÍ O SEÑOR.

  

3.- Pregaria de intercesión: Deus intercede ante ti por algún dos seus fillos ou fillas.

En silencio, pechamos os ollos, poñemos as mans como collendo outras mans, mentalmente estamos collendo a man ou mans concretas dalgún fillo ou filla de Deus que el me encomenda. Déixome estar así en silencio. Esa persoa precisada de apoio é o gran sacramento de Cristo para ti, entre nós.

4.-  Compartimos: algo a pregaria, algunha chamada, algunha caricia, algunha urxencia de Deus a través de calquera persoa ou circunstancia.

  

5.- Rematamos este momento coa oración do Noso Pai/Nai, en quen vivimos e existimos...