Tempo Ordinario: 13ª semana

30 de xuño: Domingo 13 do tempo ordinario

Evanxeo: Lc 9, 51-62

Cando se ía cumprir o tempo de ser levado deste mundo, decidiu en firme ir a Xerusalén. E mandou mensaxeiros por diante. Entraron estes nunha aldea de samaritanos para lle prepararen pousada, pero non o recibiron, porque se decataron de que ía cara a Xerusalén. Ao veren isto, os discípulos Santiago e Xoán dixeron:

—Señor, ¿queres que digamos que baixe do ceo un raio e que os parte?

Pero el volveuse cara a eles e rifoulles. E foron para outra aldea. Polo camiño unha persoa díxolle:

—Seguireite vaias onde vaias.

Respondeulle Xesús:

—As raposas teñen tobeiras e os paxaros teñen niños; pero o Fillo do home non ten onde pousar a cabeza.

Díxolle a outra persoa:

—Sígueme.

Pero esta persoa contestoulle:

--Déixame ir primeiro enterrar a meu pai.

Respondeulle:

—Deixa que os mortos enterren os seus mortos; ti vai anunciar o Reino de Deus.

Outra persoa díxolle tamén:

—Señor, seguireite, pero deixa que primeiro me despida da miña familia.

Contestoulle:

—Quen despois de por a man no arado, mira para atrás, non é apto para o Reino de Deus.

Tempo Ordinario: 12ª semana

  

23 de xuño: Solemnidade do Corpo e Sangue de Cristo

Evanxeo: Lc 9,11b-17

Unha vez Xesús empezou a falarlle á xente do reino de Deus e curaba a cantas persoas o necesitaban. E, como xa ía caendo o día, achegáronse os doce e dixéronlle:

—Despide a xente, para que vaian as vilas e aldeas próximas en procura de sitio para se hospedaren e onde atopen algo que levar á boca, porque aquí estamos nun descampado.

Pero el contestoulles:

—Dádelles vós de comer.

Eles contestaron:

—Pero, se non temos máis ca cinco bolos de pan e dous peixes! A non ser que vaiamos mercar mantenza para toda esta xente.

Eran uns cinco mil homes. Pero el díxolles aos seus discípulos:

—Colocádeos en grupos e cincuenta.

Dixéronllelo e sentaron todos. El colleu os cinco pans e máis os dous peixes, ergueu a vista ao ceo, bendiciunos, partiunos e déullelos aos discípulos, para que llelos servisen á xente. Comeron todo a fartar e coas sobras encheron aínda doce cestas.

Tempo Ordinario: 11ª semana

16 de xuño: Solemnidade da Santísima Trindade

Evanxeo: Xn 16, 12-15

Unha vez díxolles Xesús ás persoas que o acompañaban:

—Aínda teño moitas cousas que vos dicir, pero non podedes con elas agora. Cando veña El, o Espírito da verdade, havos encamiñar á verdade plena, pois non vos falará pola súa conta, senón que vos dirá o que escoitou e anunciaravos o que ha de acontecer. El hame glorificar, pois recibirá do meu e proclamarávolo. Todo o que ten o Pai é meu, por iso díxenvos que recibirá do meu e volo manifestará.

Tempo Ordinario: 10ª semana

9 de xuño: Domingo de Pentecoste

Evanxeo: Xn 20,19-23

Naquel día, o primeiro da semana, ao serán, estando pechadas as portas onde estaban os discípulos por medo dos xudeus, chegou Xesús, púxose no medio deles e díxolles:

—Paz convosco.

Dito isto, mostroulles as mans e máis o costado. Os discípulos alegráronse vendo o Señor. El díxolles outra vez:

Paz convosco; como o Pai me mandou a min, tamén eu vos mando a vós.

E, dito isto, alentou sobre eles e díxolles:

—Recibide o Espírito Santo; a quen lles perdoedes os pecados, quedaranlles perdoados; a quen llelos reteñades, quedaranlles retidos.

5º Encontro 2018 / 2019

1.      Introdución dos signos pascuais: cruz, loureiro, luz e auga.

   O loureiro está enriba da mesa.

a)      Entrada do cirio pascual, estando a escuras.

CANTO:

A Cristo cantamos na luz que alumea,

a Cristo cantamos co lume da fe.

PREGARIA:

Grazas, Xesús, que me iluminas

coa luz vigorosa do teu rostro,

cos rostros ignorados de quen sofre

á espera de olladas solidarias.     

b)      Entrada da auga.

CANTO:

Que ben sei eu da fonte

que mana e corre

anque é de noite.

(Aspersión coa auga bautismal)

PREGARIA:

Grazas, Xesús, que me renovas,

facéndome inocente, transparente,         

gozando a fonda dita de ser fill@,

de ser irmá, irmán, familia, pobo,

nesta longa ascensión cara o teu seo

onde todo está en ti, e ti en todo.