Encontro en Sobrado dos Monxes:

Sobrado, 9 de xuño de 2019

Oración da mañá / preparación para a Eucaristía

1.- Tempo de silencio interior integrador para abrirnos ao Espírito

2.- Oración no Espírito Santo

CANTO:

MANDAS O TEU ESPÍRITO (3) /

E RENOVAS O ROSTRO DA TERRA.

A miña alma bendí o Señor, meu Deus ¡que grande es!

Estou en ti, Espírito divino,

ti que asentas a túa luz no meu seo,

Pai amoroso do pobre,

dons nos teus dons tan espléndido,

luz que alumeas as vidas,

fonte do maior consolo.

Estou en ti, doce anfitrioa das vidas,

descanso do noso esforzo,

tregua no duro traballo,

brisa nas horas de afogo,

gozo que enxugas as bágoas

e nas dores dás conforto.

Entras ata o fondo do ser,

divina luz e enriquécesnos;

¡que grande o baleiro da xente,

se ti nos faltas por dentro!

¡que grande o poder da maldade,

se me pecho ao teu alento!

Regas a terra en secura,

sandas o corazón enfermo,

lavas as manchas, infundes

calor de vida no xeo;

domas o espírito indómito,

guías a quen torce o carreiro.

Compartes os teus infinitos bens

conforme a fe dos teus servos;

na túa inmensa bondade

dáslle ao esforzo o seu mérito

salvas a quen busca salvarse

e dásnos o teu gozo eterno.

3.- Lecturas da Misa de hoxe:

1ª: Feit 2, 1-11

2ª: 1Cor 12, 3b-7.12-13

Evanxeo: Xn 20, 19-23

Naquel día, o primeiro da semana, ao serán, estando pechadas as portas onde estaban os discípulos por medo dos xudeus, chegou Xesús e, poñéndose no medio, díxolles:

—Paz convosco.

Dito isto, mostroulles as mans e máis o costado. Os discípulos alegráronse vendo a Xesús. El díxolles outra vez:

—Paz convosco. Como o Pai me mandou a min, tamén eu vos mando a vós.

E, dito isto, alentou sobre eles e díxolles:

—Recibide o Espírito Santo; a quen lles perdoedes os pecados, quedaranlles perdoados; a quen llelos reteñades, quedaranlles retidos.

Comentario:

O Espírito andou por alí, moi activo. Cóntannolo de mil maneiras. Posibilitou o encontro con Xesús resucitado. E xerou os  seus dons.

Os dons do Espírito: Paz, alegría, sentido de misión: contar o experimentado, capacidade de reconciliación consigo mesm@ e cara á demais xente.

A primeira e a segunda lectura confírmannos que hai Espírito para todo o mundo, e que cada quen o recibe e manifesta da súa maneira. ¿Cal é o meu Espírito, o don ou dons  que Deus me deu para o  servizo da comunidade? Agradézoo, cóidoo, contribúo con el ao coidado da comunidade, da sociedade?

4.- Cando xorde o espírito

Cando xorde o Espírito,

aparece a pluralidade, agroma a diferenza

integrada polo respecto, no amor.

Grazas, Señor.

Cando alenta o Espírito,

cada un é cada unha

co seu don, coa súa graza particular

consentida, valorada, recoñecida

como don comunitario do creador.

Grazas, Señor.

Cando empuxa o Espírito,

todos temos a palabra,

todos temos oídos para escoitala,

todos, todas, nos facemos discípulas de todas,

nun canto precioso á vida, ao seu candor.

Grazas, Señor.

Cando afala o Espírito,

ninguén anula a ninguén,

ninguén se apropia de nada,

ninguén se constitúe en señor nin en señora,

todos, todas nos facemos pobres no Espírito,

a  irmandade brilla con gran esplendor.

Grazas, Señor.

Cando o Espírito é acollido,

as voces miúdas son especialmente atendidas,

as voces pobres, as voces pequenas,

as voces de quen non ten voz,

as voces oprimidas, apagadas, silenciadas,

as voces femininas,

nun afán valente de dignidade e honor.

Grazas, Señor.

Cando o Espírito fala

falan as linguas  cohibidas, desprezadas,

coma o galego;

e son amadas, coidadas, espalladas,

humildemente,

coma graza e don particular,

como precioso aporte enriquecedor.

Grazas, Señor.

5.- Rito de imposición das mans

Cal é o don do Espírito que eu penso ter como cousa especial miña, co que contribúo á vida da familia, da comunidade, da sociedade?

Cal é o don que me gustaría ter, ou que teño, pero está agochado en min por medos, covardías…, e non me enriquezo con el, nin enriquezo a outras persoas?

Agradecendo o don que teño, desexando de corazón o don que me gustaría ter, pídolle ao compañeiro/compañeira que me impoña as mans no nome da comunidade, no nome do mesmo Deus.

Despois eu impóñollas a el/ela.

CANTO:

IDE E PREGOADE A NOVA DE DEUS,

IDE E PREGOADE A NOVA DE DEUS,

IDE E PREGOADE POLO MUNDO ENTEIRO,

IDE E PREGOADE A NOVA DE DEUS.